Utoqqarmiut Kangerluarsunnguanni allilerinissamut neqeroortitsinerup taamaatinneqarnera
Utoqqarmiut Kangerluarsunnguanni erngup nukinganik innaallagissiorfiup allilerneqarnissaa pillugu neqeroortitsineq ingerlasoq taamaatinniarlugu NunaGreen aalajangerpoq.
Suliassanut tamakkiisunut sanaartornermut akigititassanut isumaqatigiissutip neqeroortitsivigineqarneranut atatillugu kingorna neqerooruteqarsinnaasunik pingasunik piukkunnartussarsioreernerup kingorna neqeroorut ataasiinnaq NunaGreen-ip tiguaa. Neqerooruteqartumut ataatsimut tassunga pilersitsiviulluartumik isumaqatiginninniartoqaraluartoq NunaGreen naliliivoq, ilaatigut neqeroorutip qaffasissusiani neqeroortitsinerup ingerlanerani unammillertoqarsimannginnera malunnartoq, ilaatigut NunaGreen-ip sanatitsisutut annaasinnaasai nammagassaalertussat pilerinaateqanngitsut.
Utoqqarmiut Kangerluarsunnguanni erngup nukinganik innaallagissiorfiup allilerneqarnissaa, Kalaallit Nunaanni siunissami nukissiamik pilersuinermut suliassani suli qitiuvoq, aammalu suliassap suliarineqarnera ingerlatiinnarneqarpoq. Aqqutissamik aqqusinniorluni piareersaataasumik suliaqarneq ingerlateqqinneqarpoq, aammalu suliassap ataatsimoortup sapinngisamik kigusinaarnissaata killilersimaarneqarnissaa maannakkut ukkatarineqalerpoq.
Suliassap ingerlanneqarneranut suliap ingerlaqqinnissaa pillugu erseqqinnerusut aasartinnagu nalunaarutigisinnaanissaat NunaGreen-ip naatsorsuutigaa.
”Neqeroortitsinerup isumaqatigiissuteqarnermik suliassallu aallartinneranik kinguneqarsinnaanissaa siunnerfigalugu sulisimavugut. Tamanna iluatsinngitsoormat, unammilleqatigiinnissaq tunngavissinnerullugu suliassarlu patajaannerusumik ingerlallugu, suliap ingerlaqqinnissaa aaqqissuutissagipput pingaaruteqarpoq. Peqatigisaanik sanaartugassami taamatut angitigisumi aarlerinaataasut qulaajarnissaat annertuumik ukkataraagut, taamaalilluni taanna patajaatsunik tunngavilimmik inuiaqatigiinnullu iluaqutaasumik piviusunngortinneqarsinnaassalluni,” oqarpoq Aviaaja Karlshøj Knudsen, NunaGreen-imi pisortaaneq.
