NunaGreen Construction Disko Bay A/S-ip ullumi Qeqertarsuup Tunuani nutaamik erngup nukinganik innaallagissiorfiliornissap pilersaarusiorneranut sanaartornissaanullu atatillugu siunnersortinut isumaqatigiissut neqeroortitsivigaa. Qasigiannguit aamma Aasiaat siunissami innaallagiamut kiassarnermullu nukissiamik aalajaatsumik mingutsitsinngitsumik pilersorneqarsinnaanissaat, erngup nukinganik innaallagissiorfimmi qulakkeerneqassaaq.
Siunnersortinut isumaqatigiissummi ilaatinneqarput sanaartugassap ilusilersorneqarnissaanut siunnersuusiorneq, neqeroortitsinermut najoqqutassanik piareersaaneq kiisalu sanaartugassamut akigititassanut neqeroortitsinerup ingerlanneqarnera. Isumaqatigiissut 2026-miit 2032-mut atuutissasoq naatsorsuutigineqarpoq.
Siunnersortit suliassamut neqerooruteqarnissaat NunaGreen-ip qilanaaraa. Erngup nukinganik innaallagissiorfiliornerup iluani paasisimasaqarneq pingaaruteqarluinnartussaavoq, kisianni siunnersortinik kalaallinik suleqateqarneq aamma pingaartinneqassaaq.
Neqeroortitsineq ammasumik neqeroortitsinertut ingerlanneqarpoq, aammalu siunnersuisartut suliffeqarfissui piumasaqaatinik naammassinnittut tamarmik, neqerooruteqarnissamut periarfissaqarput. Neqeroortitsineq Dalux aqqutigalugu ingerlanneqassaaq.
Qeqertarsuup Tunuani erngup nukinganik innaallagissiorfissaq 21 MW-inik (3 x 7 MW) sakkortussuseqassaaq aammalu Qasigiannguani Aasiannilu innaallagiamik kiassarnermillu pilersuinermut nukissiamik ataavartumik pilersuisussaalluni. Kalaallit Nunaata nukissiornikkut imminut pilersornerata nukittorsarnissaata tungaanut suliniut alloriarneruvoq pingaaruteqartoq aammalu nunatsinni CO₂-mik aniatitsineq annikillisittussaallugu - mingutsitsinnginnerusumik siunissaqarnissamut Namminersorlutik oqartussat periusissiaannut naapertuuttumik.
Piffissamut killigititat, paasissutissat annertunerusut atugassarititaasullu neqeroortitsinermut najoqqutassani allassimassapput. Najoqqutassat kingusinnerusukkut 2025-mi septembarip 23-ani link manna aqqutigalugu pissarsiarineqarsinnaalissapput:
Takuuk neqeroortitsineq Dalux-ip nittartagaani
Neqeroortitsinermut aallaaviusut pillugit apeqqutissaqaraanni sanatitsisup suliniummut aqutsisua Esben Pedersen (efp@nunagreen.gl) saaffigineqarsinnaavoq.
