Utoqqarmiut Kangerluarsunnguanni erngup nukinganik innaallagissiorfiup allilerneqarnissaanut neqeroortitsinerup ingerlanera ingerlallualeruttorpoq. NunaGreen Construction Nuuk A/S-ip maannakkut suliassanut tamakkiisunut sanaartugassamut akigititassanut piukkunnartussarsiuussineq ingerlatereerpaa, aammalu entreprenørit suliffissui pingasut suliassap suliarineqarnissaanut neqerooruteqarnissamut piukkunneqarput.
Suliassami ilaatinneqarput 16 km-isut takissusilimmik sulluliorneq, pingasunik kaavittulimmik nutaamik innaallagissiorfiliorneq kiisalu innaallagiamut aqqusersuutit 36 km, erngup nukinganik innaallagissiorfittaassamit innaallagissiorfimmut pioreersumut atassusiisussaq. Taamatut allilerinermi pisinnaasat pingasoriaatingajanngussapput – 45 MW-iniit 121 MW-inut, tamatumanilu ukiorpassuarni qulikkaani aggersuni Nuummut nukissiamik ataavartumik pilersuinissaq qulakkeerneqassaaq.
Entreprenørit suleqatigiiaat piukkunnartussarsiuussinermi piukkunneqartut, neqeroortitsinerup ingerlanerani ingerlaqqittussat, tassaapput:
Suliassaq Best and Final Offer (BAFO)-imi suliap ingerlanerani suliassanut tamakkiisunut sanaartugassamut akigititassanut isumaqatigiissutitut neqeroortitsivigineqassaaq, tassani entreprenørit piukkunnartussarsiuussinermi piukkunneqartut unammilleqatigiippalaartumik isumaqatiginninniarnerup ingerlanerani inaarutaasumik neqeroorutiminnik pitsanngorsaanissamut periarfissinneqassallutik. Sanaartornermik suliaqarneq 2026-mi aallartissasoq naatsorsuutigineqarpoq, aammalu erngup nukinganik innaallagissiorfittaassap 2032-mi ingerlanneqalernissaa pilersaarutigineqarpoq.
2025-mi martsimi piareersaataasumik nunap suliarineqarnissaa pillugu neqeroortitsineq alla saqqummiunneqassaaq. Suliassaq taanna suliassanut pingaarnernut sanaartugassamut akigititanut isumaqatigiissutitut, najukkaneersunut suliaqartuusunut siunnerfeqartinneqartutut, neqeroortitsivigineqassaaq aammalu ilaatinneqassalluni aqqusernup pioreersup 14 km-iusup nutarterneqarnera kiisalu sanaartornermi aqqusinermut 8 km-isut takissusilimmut allamut periarfissaqassalluni.
“NunaGreen A/S-ip suliassap soqutigineqarnerujussua nuannaarutigisorujussuuaa, neriunarluni missingersuutit iluanni unammillersinnaassusilinnik neqerooruteqartoqarnerani inerneqassasoq,” oqarpoq Aviaaja Karlshøj Knudsen, NunaGreen A/S-imi pisortaaneq.
