NunaGreen Construction Nuuk A/S-ip Utoqqarmiut Kangerluarsunnguanni erngup nukinganik innaallagissiorfiup allilerneqarnissaata tungaanut alloriarnerit ataasiakkaat siullersaat alloriarfigaa. Ulloq 4. april suliariumannittussarsiuussinermi entreprenørinit najukkaneersunit pingasunit neqeroorutit tiguneqarput. Neqeroorut pitsaanerpaaq GREENLAND NATIONAL CONTRACTORS ApS (GNC) -meersuuvoq, taamaattumillu taassuma suliassap sumiiffissaanut sulinermi aqqusernup pioreersup nutarternissaanut tallineqarnissaanullu suliassaq suliarisussanngorpaa.
Suliassami, sanaartugassanut pingaarnernut akigititassanut isumaqatigiissutissatut neqeroortitsivigineqartumi, ilaatinneqarpoq aqqusernup pioreersup 14 km-iusup nutarterneqarnissaa kiisalu aqqusernup 8 km missaannik tallineqarnissaanut periarfissaqartinneqarluni. Suliaqarneq piffissami sanaartorfiusussami aallartissaaq aammalu Kalaallit Nunaanni illuliornermik sanaartornermillu inuussutissarsiuteqartuni ukiormanna suliassaqartitsilereertussaalluni. Inuplan A/S sanatitsisup siunnersortaatut toqqarneqarpoq aammalu nakkutilliinermik suliassaq ingerlatissallugu.
“Entreprenørip najukkameersup suliassaq pingaaruteqartoq taanna suliarisussanngormagu nuannaarutigisorujussuuarput. Tamatuma takutippaa mingutsitsinngitsumut allanngoriartortitsineq najukkami aningaasarsiortitsisoq, peqatigisaanillu suliaqarnissarpiap aallartinnissaanut anguniakkani killiffiulluni annertooq,” oqarpoq Aviaaja Karlshøj Knudsen, NunaGreen A/S-imi pisortaaneq.
Suliassamut pingaarnermut annertuumut – Utoqqarmiut Kangerluarsunnguanni erngup nukinganik innaallagissiorfiup allilerneqarnissaanut –, innaallagissiorfimmut nutaamut, sulluliamut pilersuinermilu aqqusersuutinut tunngassuteqartumut, aqqusineq pisariaqarpoq. Suliassanut tamakkiisunut akigititanut isumaqatigiissummut tassunga neqeroortitsinerup ingerlanera ingerlallualeruttorpoq. Nunani tamalaani suliffissuit pingasut piukkunnartussarsiuussinermi toqqagaapput, taakkualu maannakkorpiaq neqerooruteqarnissaq sulissutigaat. Naatsorsuutigineqarpoq suliassaq pingaarneq 2026-mi aallartissasoq.
“Neqeroortitsinerup annertuup ingerlaneranut ingiaqatigitillugu aqqusernup suliarineqarnera aallartissinnaagatsigu nuannaarutissaavoq. Tamatuma kingunerisaanik piffissaq sanaartorfiusussaq pitsaanerpaamik atorluarsinnaavarput aammalu suliassaq siumut ingerlatissinnaalerlugu,” naggasiivoq Aviaaja Karlshøj Knudsen.
