Qeqertarsuup Tunuani Qasigiannguit kujataani nutaamik 21 MW-mik imermit nukissiorfiliornissaq innaallagissamullu aqqusersuutiliornissaq pilersaarutaavoq.

Suliniummi ilaatigut sakkortusaavinnik pingasunik sanasoqassaaq, tatsinullu marlunnut atassusiisumik 6 km-mik sullorsualiortoqassalluni. Imermit nukissiorfimmit innaallagissamut aqqusersuutit Qasigiannguit eqqaannut nukissiorfimmut atassuserneqassapput, aqqusersuutillu aappaat Aasiannut atassuserneqassalluni. Avatangiisunut sunniutit minnerpaaffissaaniitinniarlugit, ilaatigut innaallagissamut aqqusersuutinit Naternaq aqqusaarneqassammat, sukumiisumik avatangiisinut naliliinerit ingerlanneqarnikuupput.

Imermit nukissiorfissaq 21 MW-mik pilersuisinnaassaaq Aasiannut Qasigiannguanullu innaallagissamik kiassanermillu pilersuissalluni. Imermit nukissiorfik pilersaarutaasoq illoqarfinnut taakkununnga marlunnut ikummatissanik, maanna dieselimik uuliamillu, innaallagissamut kiassanermullu atuinerannik annikillisitsissaaq.  

2025-mi imermik innaallagissiorfissamut nutaamut Aasiannut Qasigiannguannullu innaallagissamik ataavartumik pilersuisussamik sanaartulernissaq siunertaralugu sumiiffimmi misissuinerit ingerlanneqarput. Misissuinermi ilaatigut qillerinerit, tatsit itissusaannik uuttortaanerit, sajuppillatsitsillunilu misissuinerit ingerlanneqarput. Saniatigut aamma ASN-mut nalunaarusiaq 2025-mi aasaanerani tusarniaassutigineqartumut atatillugu innuttaasunut ataatsimiisitsinerit ingerlanneqarput Naalakkersuisut tusarniaanerannut linki.