Hans-Ulrik Skifte, 2023-mi apriilimiilli ingerlatseqatigiiffimmut Namminersorlutik Oqartussanit pigineqartumut NunaGreen A/S-imut siuttuusimavoq. Suliniutini nutaani allaanerusunik piginnaasaqarfeqarnissaq pisariaqartarpoq, taamaattumillu siulersuisut pisortaanermut tunuarnissamut isumaqatigiissuteqarput.
NunaGreen A/S siusinnerusukkut Nunaoil-iusimasumik ingerlatitseqqiineruvoq. 2022-mi decembarimi taamaalilluni aalajangiisoqarpoq ingerlatseqatigiiffiup siunertaa allanngortinneqassasoq aammalu siunissami mingutsitsinngitsumut allanngoriartortitsineq aammalu Kalaallit Nunaannut iluaqutaasumik mingutsitsinngitsumik nukissiornermi aaqqiissutissat sukkatsitinnissaat sulissutigissagai.
Utoqqarmiut Kangerluarsunnguanni erngup nukinganik innaallagissiorfiup allilerneqarnissaata kiisalu Qasigiannguit Aasiaallu akornanni erngup nukinganik nukissiorfiliornissap qulakkeernissaat, NunaGreen A/S-ip 2023-mi suliassarilerpai. Sanaartugassat aallartinnissaasa siumullu ingerlatinnissaasa qulakkeernissaanut, allanik piginnaasaqartunik pisortaqarnissaq pisariaqartinneqartoq, NunaGreen-ip sanaartugassat nutaat annertoorujussuit taakkua qanoq pitsaanerusumik kivissinnaanerai paasinarsisitsiniarluni, sukumiisumik suliaq ingerlatereerlugu siulersuisut isumaqatigiillutik naliliipput.
Taamaattumik Hans-Ulrik Skifte, NunaGreen A/S-imi pisortaanertut tunuassasoq pillugu siulersuisut isumaqatigiissuteqarfigaat, taamatullu NunaGreen-imi allamik pisortassarsiornissamut suliap ingerlanissaa aallartinneqassalluni.
Piffissamut tamatuma tungaanut NunaGreen-imi allaffissornermut pisortaq Karen Anne Arleth pisortaanertut ikkunneqarallarpoq.
Siulersuisut Hans-Ulrik, NunaGreen A/S-ip aallarnisarneqarnerani sulisimaneranut qutsavigaat.
Paasissutissanik annertunerusunik piniarnermi: Ingerlatseqatigiiffimmi siulersuisunut siulittaasoq Line Frederiksen oqarasuaammut 522480-imut attavigisinnaavat, mail lif@nunagreen.gl.
